رد: نهاية الحب

من طرف **قمره** 2009-07-26, 00:44

صفاء : مينونه انتي ؟ تبين خالي يزفنا
مريم : لا مابيزفنا
صفاء : حضرتج ماتدرين الساعه جم ؟
مريم طالعت الساعه كانت 1 بالليل

مريم : اففف .. ابي اروووح
صفاء : امممم .. اقدر اخلي ابوي يمر علينا ؟! اكيد بيروحون ؟!
مريم نقزت بفرح : ايه صح اتصلي فيه
صفاء : اوكيه ..

اتصلت صفاء في ابوها .. وبعد محاولات وجولات وصراع << داشه حرب
وافق ابوها يمر عليهم

صفاء واهي تصك التليفون : قومي لبسي عباتج .. ابوي الحين بيوصل
مريم : زين خبري منايه وروان
صفاء : اوكي بسرعه

مرت 10 دقايق والبنات كلهم في الصاله يتريون بومبارك < ابو صفاء ومنى
يمر عليهم .. بس روان تعذرت بدانه .. ماتقدر تخليها بروحها
وصل بومبارك وركبو كلهم السياره واهمه يدعون الله يسهل عليها

في المستشفى .. منار دخلوها غرفة الولاده المخاض كان صعب عليها وخصوصا اول مره كان تتألم وايد و الولاده كانت عسره .. والدكاتره والنرسات على راسها يراقبون تخطيط قلب البيبي لأن كان تعبان شوي

الدكتوره : تحملي شوي .. عشان البيبي تحملي .. مانبي نسوي لج قيصرية
منار : سوو لي قيصريه وفكوني ماستحمل العوار
الدكتورة : حاولي تتنفسين بعمق .. الولاده الطبيعيه احسن .. سمي بالله وتنفسي

في غرفة الانتظار .. الكل كان مشغول باله على منار وايد تأخرت الحين الساعه 4 ام علي كانت تقرا قرآن وتدعي الله يسهل عليها والبنات ساكتات وعينهم على باب غرفة الولاده

الدقايق تمر ببطئ شديد وسكون قاتل ومنار بعدها تقاوم الألم بتعب وعلى الساعه 6 الكل وعى على صوت صياح ..
كان صياح البيبي .. يمكن كان منزعج ليش ماخلوه براحته و غصبوه يطلع للدنيا اللي ماينعرف شنو تخبي بين ثنايانا وطياتها .. لكن هذي سنة الحياه وهذي دورة الحياه .. وماتكمل هالحلقه الا بهالشئ

البنات ماقدرو يحبسون دموعهم وام علي حمدت الله وبوعلي تنهد بأرتياح

واقل من 10 دقايق طلعت النرس وعلى ويها أبتسامه

الممرضه : مبروك ياتكم بنت مثل القمر ماشاء الله
بوعلي : طمنينا ! شلونها ؟
هزت الممرضه راسها : لا تخاف الحمدالله البيبي بخير .. والأم الحمدالله بخير .. تعبت وايد ولازم ترتاح

بوعلي : الحمدالله .. ممكن نشوف بنتنا ؟؟؟
الممرضه : ايه اكيد .. الحين اييبها

واقل من دقيقتين .. طلعت الممرضه واهي حامله بطانيه ورديه ملفوفه .. الكل اقترب وشافو ملاك راقد .. انغرمو كلهم بهالطفله من اول نظره كانت حلوه بشكل فظيع .. بشرتها ورديه وخدودها مليانه خشمها صغييييير واصابعها صغااار وضامتهم بقوووه .. كانت احلى ياهل في العائله مثل ماقالت ام علي

مريم بهمس : ياربي فديتها .. حلوه تينن ما شاء الله
بوعلي : ما شاء الله .. عطيني اياها بأذن في أذنها

شال بو علي البيبي من يد النرس .. وقعد يأذن في اذنها

وبعد ماتطمنو على منار راحو البيت عشان يرتاحون وعشان ترتاح منار

منار سمت بنتها .. اليــــازيــه

وبقدوم اليازيه انفرجت اسارير الفرح .. كانت مثل الهبه من السماء الكل كان حاس براحه روحيه غريبه و ارتياح نفسي .. من هالطفله الصغيره اللي هلت عليهم و صارت فرد من العايله الحين

صار له يوم ماذاق طعم النوم .. من امس سهران من بعد ماشافها وحرقت له قلبه .. سلمان كان تعبااان نفسيا وجسديا التعب كان مبين عليه .. محتار ومو عارف شلون يتصرف وماقدر يتقبل فكرة ان مريم تكون زعلانه منه .. بس مريم صدمته وخدشت كبريائه بكلامها والريال اهم ما عنده عزة نفسه .. وسلمان عمره مانزل نفسه لأحد اذا اهو مو غلطان لو من يكون عشان جيه ماكان يقدر يكلمها مره ثانيه لان هالشئ بالنسبه له يمس كرامته خصوصا ان اهو مو غلطان .. الافكار كانت متضاربه في راسه كبريائه ونداء قلبه مو عارف يرضي من .. اهو يموووت فيها ويحبها بس بعد مايقدر يدوس على كرامته وبعد صولات وجولات مع افكاره امتدت يده لعلبة الاقراص المنومه وخذ حبتين وحاول يرقد شوي ويرتاح ..

سلمان كان قلبه معوره على اخته الحبيبه نورة .. باجر بيكون عرسها واليوم خطيبها سلطان بيوصل اهو وعدها ان ياخذها ويوديها المطار .. اهو اخوها الوحيد يعني نورة محتاجته يوقف وياها ويشيل ويحط في عرسها بس للأسف سلمان مو قادر يحس بالفرحه شلوون يستانس وقلبه يتقطع ومطعون ؟ وشوي شوي حس بتأثير المنوم وحط المنبه ع الساعه 2 الظهر عشان يقدر ياخذ اخته المطار مثل ماوعدها

وفي بيت شريفه الاجواء كانت هاديه .. شريفه قاعده ويا امها تشوف تلفزيون وابوها قاعد يقرا الجريده في هالوقت رن تلفون ابو شريفه والرقم كان غريب عليه

بو شريفه( حمد) : الو السلام عليكم
--- : وعليكم السلام ورحمة الله .. هاي تلفون حمد خليفه ؟
حمد : ايه نعم .. منوو معاي لو سمحت ؟
--- : معاك محمد العالي
حمد : والنعم فيك مرحبا ملايين اخوي شلونك ؟
محمد ( شد ) : الحمدالله بخير .. شلونك انت عساك بخير ؟
حمد : مااشكي باس
خالد : الحمدالله ..

المتصل كان بو راشد عم مريم وطبعا انتو عارفين ليش متصل ؟ ايه صح متصل عشان موضوع شريفه و خالد طبعا حمد بن خليفه يعرف بو راشد .. وعقب سوالف عن الشغل واشياء اللي تخص الرياييل تكلم بو راشد بالموضوع

بو راشد : والله يا اخوي انا متصل فيك عشان موضوع يخص اخوي الصغير اللي اهو حسبة ولد خالد
حمد بأستغراب : خير ؟ آمر اخوي
شد : مايآمر عليك عدو .. اذا ماعندك مانع نحن نبي بنتكم شريفه لولدنا خالد
حمد : هاي الساعه المباركه وبنتي وين بتحصل واحد شرات ولدكم ريال والنعم فيه ماعليه زود

شريفه انصدمت يوم سمعت هالكلام .. حست بالفضول تبي تعرف من المتصل ؟ طبعا اهي البنت الوحيده !

شد : زين ياخوي انت شاور البنت ورد علينا خبر
حمد : ان شاء الله انا بشاور البنت وبارد عليكم ان شاء الله
شد : خير ان شاء الله .. وانا اترياا اتصالكم .. مع السلامه
حمد : مع السلامه

اول ما سد بو شريفه الخط التفت عليه ام شريفه وشريفه حدها متحرقصه ..

ام شريفه : خير يا حمد .. منو خاطب شريفه ؟
بوشريفه وعينه على بنته : هاي اهل ربيعتها مريم .. بيت العالي يبونها لولدهم خالد
ام شريفه : والنعم فيهم ناس زينين اصل و نعمه .. ها شرووف شرايج ؟؟
شريفه تلعثمت وتلخبطت في كلامها ويها صار احمر ودقات قلبها تسارعووو .. مزيج من احاسيس الفرح و الحجل اختلطو في قلبها
ام شريفه : اييه شريفه .. شفيج يمه ليش ماتردين ؟! ترى محد بيغصبج على شئ ماتبينه

بو شريفه كان حاس ان شريفه بترفض مثل كل مره .. وايد تقدمو لها ومن اكبر العايلات بس رفضتهم كلهم بدون سبب .. كان خايف عليها ويحاتيها مو عارف اهي ليش ترفض وماكان يبي يضغط عليها
الزواج قسمة ونصيب ومحد يقدر يتدخل فيه

بس شريفه كانت مستحيه ومو قادره ترد من المستحى

بو شريفه : خلاص يا بنتي اذا ماتبين انسي الموضوع
شريفه ابتسمت ونزلت راسها وترددت قبل ماتتكلم وسكتت شوي

بو شريفه : في شئ يا شريفه ؟
شريفه : اللي تشوفه ابوي انا موافقه

قالت هالكلمات وبسرعه قامت وراحت غرفتها وعقت روحها على السرير واهي تحظن المخده وتعصرها ودموع الفرح تهل من عينها مو قادره تيود عمرها ..

ابو شريفه استانس من الخاطر وفي نفس الوقت تعجب من رد شريفه السريع .. يمكن لأن خالد يصير عم ربيعتها واهي تعرفه وتعرف اخلاقه عشان جيه ماترددت .. وقرر يتصل في شد بعد مايسأل عن خالد و يحدد معاه موعد

في بيت بو علي .. الساعه تشير ع 12 الظهر

ام علي في المطبخ ويا الخدم تجهز الاكل والاغراض اللي بتوديهم المستشفى ومنى وياها في المطبخ تهذرب على راسها

منى : زيييين اقول لج خالوه .. من يومها البنت ما قربت صوبي
ام علي : حشى مو بنت انتي .. وشلج على بنت الاوادم خلج عاقله .. تراج بتروحين الجامعه والجو غير هناك خلي عنج سوالف الضرابه والهواش
منى : ههههه ان شاء الله خالوه ببيض ويهكم

وفي الصاله صفاء قاعده تسحي شعر دانه وروان قاعده تتكلم في التلفون

صفاء : دوينه .. خالوه منار يابت لنا بيبي حلوووووووووه
دانه : بيبي ؟
صفاء : ايه بيبي .. وايد حلوه اسمها اليازيه
دانه ضحكت وبينت غمازاتها وبرقت عينها من السعاده : بتيي بيتنا ؟
صفاء : اييه بتيي بيتنا اهني عندنا وبنحبها واااايد

دانه كانت متحمسه للضيف اليديد اللي بيي .. وكانت تعذب صفاء ماتخليها تسحي شعرها كل شوي تلتفت وتسئلها عن البيبي
صفاء : افف منج يالله قومي خلصت
دانه : انا ابي مريامي
صفاء : تسوين خير .. روحي قعدي جازورا اللي ماتشبع رقاد ولاتنسين سحبي شعرها وسويه كشه
دانه ضحكت من الخاطر على كلام صفاء و ربعت صوب غرفة مريم

وصلت دانه غرفة مريم .. بطلت الباب ع الآخر و نطت على سرير مريم ودشت تحت لحافها

مريم رقادها ثقيل .. يعني لازم احد يطق طبول على راسها يمكن تصحى .. دانه المسكينه كانت تربت بخفه عليها بس لاحياة لمن تنادي .. واخر شئ استسلمت وتعبت وقررت انها ترقد لأن ماشي فايده

في الصاله .. روان صكت التلفون والتفت على صفاء اللي كانت مشغوله بالتلفزيون ..

روان : صفاء .. حلوه البيبي ؟
صفاء ابتسمت : ايييه ما شاء الله عليها وايد حلوووه

من طرف **قمره** 2009-07-26, 00:44

روان : تشابه من ؟
صفاء : مادري بس امج تقول انها تشابه خالو منار .. بس فديييتهااا صج حلوه ما شاء الله
روان : بتروحون لها اليوم ؟
صفاء : اييه اكيد بتيين ويانا ؟
روان : ايه بايي
صفاء : زين احنا بنروح ع الساعه 4
روان : اوكي .. خبريني قبل لاتطلعون
صفاء : اوكي

منى واهي يايه من المطبخ : الغدى زاهب انا بنفسي اشرفت عليه .. يالله قوموو
صفاء : زين انا باروح انادي خالي
روان : لا خلج انا بناديه
صفاء : زين باورح اشوف علي
منى : مريم وين
صفاء شهقت بخووف : انا طرشت دوينه عشان توعيها بس ماردت صج اني غبيه .. وين راحت دانوووه

وبسرعه ركضت صوب غرفة مريم و منى وراها .. شافت الباب مشرع ع اللآخر ومريم بعدها راقده قربو شوي وشافو دانه راقده بكل استسلام ..

صفاء : هههههههههههههههههههههههههه مسكييييينه والله تعبت منها .. بس دواها عندي مريووم
منى : هههههههههه وحليلها دانووو

صفاء قربت من مريم وصرخت بصرخه في اذنها حتى دانه تروعت المسكينه وقامت تصيح

مريم واهي بعدها متروعه : بسم الله شصااااااير .. شفيكم شصاير ؟
صفاء واهي تسكت في دانه : ههه ولا شئ انتي مايفيد وياج الا جيه يالله قومي بسرعه ورانا شغل اليوم
مريم : اعوذ بالله .. جيه توعين الاوادم ؟
منى : هههههه دواج
مريم : انا باراويكم .. ياللله طلعوو من غرفتي يالمزعجات
صفاء مدت بوزها : يزانا ان يايين اناديج عشان تتغدين ويانا ؟
مريم : هههه زين بس لاتزعلين كل شئ الا انتي .. يالله كاني قمت

ونزلو البنات الصاله وقعدو ياكلون ويسولفون ويا خالهم اللي كان مستانس من الخاطر بلمتهم الحلوه بو علي وايد يحب اللمه و اليمعه و يقدر الاهل والعلاقات العائليه ويحاول كثر مايقدر ان يحافظ عليهم و يزرع هالشئ في نفوس اهله

اول ما سكنت مريم عندهم استانس وبعدين منار والحين صفاء ومنى وحبيبة قلبه اللي حبها من اول نظره اليازيه

وعقب الغده الكل روحو ع غرفهم .. مريم وصفاء و منى كانو قاعدات في غرفة مريم ..

مريم : انزين اليوم بعد المستشفى بنروح المول عشان تاخذون شئ حق عرس نورة
منى : ايه .. ونبي نروح لايف ستايل بعد
مريم : ليش ؟
منى : نبي نشتري اغراض لغرفنا .. ونبي نروح ايكيا وهوم سنتر
مريم : ماعندنا ايكيا اهني
صفاء : والله ؟
مريم ابتسمت : ايه بس نقدر نروح هوم سنتر و محل اسمه منازل فيه اشياء حلوه

** سلمان قعد على صوت المنبه وبكسل راح الحمام و تسبح وتلبس عشان يروح ويا اخته المطار .. نوره كانت تترياه و كانت متحمسه وايد عشان تشوف حبيبها وخطيبها وولد عمتها بعد هالغيبه الطويله والارض ماكانت واسعتها من الوناسه .. ركبو السياره وراحوو صوب المطار

وع الساعه 4 البنات كلهم زاهبات و ينطرون ام علي عشان يروحون المستشفى عند منار ..
بس ام علي قالت لهم يروحون ويا الدريول واهي بتيي ويا ام مبارك عشان مره وحده يروحون المول وما يصدعون راسها كل شوي

البنات كانو مرتبشين وحاطين اغاني و روان معصبه ع الآخر وصلو المستشفى وسلمو على خالتهم اللي كانت ماتشيل عينها من على اليازيه وميودتها وتبوسها كل شوي .. كانت مستغربه شلون هالطفله
بنتها وملكها وقطعه منها .. شعور غريب واحساس ماله مثيل .. احساس بالحب والحنان تجاه هالطفله والمسؤليه في نفس الوقت

وفي هالوقت .. وقف ع الباب ودق بخفه .. الكل انصدم و منار تيمعت الدموع بعينها حست بالقهر والألم الانظار كلها كانت عليها واهي صايره حمره ومو مصدقه اللي تشوفه

احمد ريلها او بالأحرى طليقها لانها ربت الحين فماتعتبر مرته ياي المستشفى يزورها شيبي وليش ياي ؟؟؟؟ صج ما يستحي !

سلم احمد الكل رد السلام الا منار لفت ويها عنه

احمد اقترب منها : شلونج منار ؟
منار طالعته بنظره حاده : بخير

في هاللحظه البنات استأذنو بس ام علي و ام مبارك راحو غرفة الانتظار لأن ماكانو يبون يخلون منار بروحها

بقت بروحها في الغرفه وياه .. واهو كان يناظر بنته ويتأمل ملامحها

احمد : ما شاء الله حلوه
منار ماردت عليه : ...

احمد واهو يشيل اليازيه : منار بعدج زعلانه علي ؟
منار بعصبيه : تصدق عاد ؟
احمد : منار انا مابي شئ انا ماستاهلج اعرف هالشئ وانا تحسفت ومستحيل ارضى على بنت عمي
منار بأستهزاء : انت رضيت علي وبعتني وخلاص
احمد : ارجوج منار
منار : خلاص احمد شوف .. انا مافيني شئ عليك كلن بطريقه .. انا تخطيت ذيج المرحله وخلاص الحين حياتي كلها لبنتي .. وانا اكيد ماراح احرمها من ابوها هاي حقها وحقك .. بس لو سمحت انا لاتقرب صوبي مالك شغل فيني
احمد : ادري منار .. انا غلطت ولايمكن اسامح نفسي انا مابي شئ منج بس اوعدج اني ماراح اتخلى عن بنتي وراح اكون وياها
منار : يزاك الله الف خير بنتي مابتحتاج احد .. حتى انت مابتحتاجك انا باربيها و باهتم فيها وباعوضها .. وماعندي مانع اذا تبي تشوفها

احمد ابتسم وطلع من الغرفه ماكان متوقع ان منار بتسامحه .. اهو غلط ويستاهل اللي صاده ماشي فايده الحين خلاص ..

منار حست بالانتصار .. خلاص ريحت قلبها وافتكت من شبح الماضي وشبح احمد اللي ماكان يفارقها ولا لحظه .. اهي حبته من كل قلبها بس اهو ماقدر هالشئ ولا حافظ عليه

** مريم ومنى وصفاء وصلو روان البيت لأن ربيعتها فطوم بتييها وراحوو اهمه الموول

وقعدو يدورون فساتين جاهزه عشان عرس نورة .. مريم فستانها كان زاهب من زمان سوته مره وحده واهي تفصل لملجتها من لبنان

و بعد ساعتين
منى حصلت فستان حلووو .. لونه وردي وفيه لمعه بنفسجيه يتكون من قطعتين .. من الساتان الخشن اللي يوقف .. يعني توب وتنورة .. التوب كان ينصك على الظهر بخيوط على شكل x والتنورة كانت ( لو ويست ) وحصلت وياه اكسسوارات بسيطه فضيه وفيها كريستالات ورديه

اما صفاء فستانها كان روعه .. كان اخضر داكن و يتكون من قطعتين بعد .. وفيه لمعه ذهبيه
الدلعه كانت على شكل v و التنورة بعد كانت ( لو ويست ) وفيها ذيل طوووويل وطايح عشان جيه خذت وياه كعب عالي وايد

خلصو البنات من الفساتين وحجزو في صالون .. وراحو هوم سنتر ولايف ستايل عشان ياخذون اغراض لغرفهم .. وماخلو شي وماخذوه من ستاير و شراشف و مخدات و اكسسورارات ع الساعه 8 كانو في البيت .. تعشووو وقعدو يطالعون تلفزيون بس مريم كانت مضجيه وايد وراحت غرفتها وقعدت تفكر في سلمان .. شكثر وحشها ماتستحمل تعيش بدونه صج انها تضحك بس محد يعرف شفيها من الداخل .. احتارت وايد وفي النهايه قررت انها تقطع الشك باليقين .. وانها تتبين الحقيقه .. مو من سلمان ! من لولوه

قررت انها تتصل في لولوه وتسئلها وتعرف السالفه منها .. راحت صوب التلفون وقعدت تدور رقم لولوه ولقته في دفترها اتصلت على الرقم وردت لولوه

مريم : السلام عليكم
لولوه : وعليكم السلام .. منو معاي ؟
مريم بتردد : معاج مريم
لولوه خافت : اي مريم ؟
مريم : مريم مرة سلمان

لولوه من سمعت هالكلمه خافت ازيد وتمنت لو الارض تبلعها .. لولوه كانت طيبه بطبعها بس انعمت وقص عليها الشيطان وطبعا روان لعبت دور في هالشئ

لولوه : هلا مريم .. شلونج
مريم : تمام ونتي ؟
لولوه : الحمدالله

مريم بتردد : لولوه بغيت اسئلج سؤال !
لولوه : خير ؟
مريم : سمعيني لو سمحتي للأخر .. انا وصلني كلام ان سلمان كان يحبج وانتي تحبينه .. وان اهو كان على علاقه وياج .. وان حبه لي كان مجرد تسليه ومصلحه .. السموحه على كلامي بس والله انا تعبت مو قادره افكر .. انا خلاص مليت من هالدنيااا الله يخليج لولوه ريحيني انا مو عارفه اصدق من .. انا ماعندي شئ عليج بس ابي اعرف الصج .. ويوم اللي شفتكم ويا بعض تحطمت خلاااص و فقدت الثقه في الكل

لولوه : ......

مريم : لولوه ردي علي ..!

لولوه واهي تغمض عيونها وتستعد للكلام الللي بتقوله : لا يا مريم .. سلمان بريء من كل اللي قلتيه انا جذبت وانا قلت هالكلام للبنات لأني كنت احب سلمان ومابيج تاخذينه .. انا ماقدر اكثر من جيه ماقدر ابني سعادتي ورغبتي في الانتقام على حساب سعادة غيري .. انا ماقدرت ارقد في هاليومين ضميري انبني والله .. ويوم اللي شفتيني وياه انا جبرته ايي وقلت له ابيك في سالفه ضرورويه واهو مسكين خاف ولاني بنت عمه طاعني وكان يبي يقولج صدقيني .. اهو يحبج وانتي تحبينه وانا الله يصبرني

لولوه ماذكرت اسم روان لانها ماتبي تسوي لها سالفه لانها تظن ان روان كانت تبي تساعدها ..

مريم سمعت كلام لولوه واهي مبطله عيونها ع الأخر .. لا مستحيل اللي اسمعه مايصير ! لاااا شلووون ؟؟؟ انا شسويييييت

مريم حست بحراره في جسمها والعبره خانقتهاااااا
لولوه واهي تغمض عيونها وتستعد للكلام الللي بتقوله : لا يا مريم .. سلمان بريء من كل اللي قلتيه انا جذبت وانا قلت هالكلام للبنات لأني كنت احب سلمان ومابيج تاخذينه .. انا ماقدر اكثر من جيه ماقدر ابني سعادتي ورغبتي في الانتقام على حساب سعادة غيري .. انا ماقدرت ارقد في هاليومين ضميري انبني والله .. ويوم اللي شفتيني وياه انا جبرته ايي وقلت له ابيك في سالفه ضرورويه واهو مسكين خاف ولاني بنت عمه طاعني وكان يبي يقولج صدقيني .. اهو يحبج وانتي تحبينه وانا الله يصبرني

لولوه ماذكرت اسم روان لانها ماتبي تسوي لها سالفه لانها تظن ان روان كانت تبي تساعدها ..

مريم سمعت كلام لولوه واهي مبطله عيونها ع الأخر .. لا مستحيل اللي اسمعه مايصير ! لاااا شلووون ؟؟؟ انا شسويييييت

من طرف **قمره** 2009-07-26, 00:45

مريم حست بحراره في جسمها والعبره خانقتهاااااا .. حست في ذيج اللحظه بكره لنفسها .. ماقدرت تستوعب اللي سمعته .. سدت الخط بدون اي كلمه ثانيه .. وقعدت بكل استسلام على السرير .. " معقووووله ؟؟؟ معقووول اللي سمعته ؟؟؟ شلوووووون ؟؟؟ ولييييش ؟؟؟ لااا حرااام مايصير جيه ؟! انا شسويييييت ؟! حراام ظلمته !!!!!

قلبها عورها ازيد واهي تتذكر شكل سلمان وشلون كان يحاول يقنعها بأنه مو قاعد يجذب عليها .. واهي كانت تصد الابواب بويها .. احساسها بالندم وشعورها بالذنب ماينوصف في هاللحظه .. اهي بيدها دمرت كل شئ و مست اواصر الثقه اللي كانت مبنيه بينهم .. و هزت عشهم الجميل اللي الكل كان يظن ماتهزه ريح .. والحين ؟! شنو الحل ؟ شلون تواجهه سلمان ؟؟

وشلون تحط عينها بعينه ؟ اهو راح يسامحها ؟ كل شئ راح يرجع مثل ماكان ؟!

مريم كانت متحسفه وبدت تصييح من الخاطر .. واهي محتاره مو عارفه شتسوي

وبعد تفكييير شالت تلفون حجرتها ودقت على رقم سلمان .. خلاص لازم تعتذر منه حتى لو ماسامحها .. لازم تتحمل النتيجه ولازم تحاول كثر ماتقدر انها تحافظ على بقايا الحب اللي جمعهم
بس تلفون سلمان كان مغلق .. حاولت مرتين وثلاث وعشر بس بدون فايده .. واستسلمت للرقاد

** اشرقت شمس الصباح وهاليوم يوم مميز وايد .. في بيت بو علي الكل مستانس لان اليوم منار راح ترجع البيت و بتييب اليازيه وياها

في بيت بو سلمان الكل مرتبش اليوم عرس نورة على سلطان واخيييرا بعد طول انتظار .. نورة كانت اكثر وحده مستانسه ومتربشه .. من بعد ماشافت سلطان امس في المطار واهي حالتها حاله .. صح انها ماكلمته لانها كانت مستحيه بس فرحت من الخاااطر بشوفته

ام سلمان : نورة قومي ارتاحي توها الساعه 8 وانتي وراج شغل
نورة : هههههههه مو قادره ارقد من امس مارقدت والله ..
ام سلمان : الله يهديج بس يالله فومي حطي راسج شوي انا باقعدج الساعه 11
نورة : ان شاء الله .. بس فديتج لاتنسين لان لازم اروح الصالون من الساعه 1
ام سلمان : ان شاء الله ..
نورة واهي تشوف ويه امها : شفيج يمه مو طبيعيه ؟
ام سلمان تنهدت : شاقول يا بنتي .. اخوج حالته هب عاجبتني .. احس فيه شئ مثجل عليه
نورة ابتسمت : مافيه الا العافيه .. تلقينه مشغول ويا حرمته عشان جيه تقولين انج ماتدرين عنه
ام سلمان : جايز .. الله يهديه ان شاء الله .. يالله قومي بنتي ارتاحي شوي
نوره باست امها ع راسها وركبت فوق .. بس قبل ما تدخل غرفتها راحت غرفة سلمان دقت الباب بس مارد عليها .. وكلمت طريجها لغرفتها عشان ترتاح شوي

في بيت بو علي .. ام علي و بو علي ودانه قاعدين يتريقون

بو علي : ليش محد نزل يتريق ؟
ام علي : شدراني فيهم .. هذيلا متعودين على السهر حتى دوينه تعلمت منهم صح دوينه ؟
دانه واهي تبتسم : انا اقعد الصبح عشان اروح الروضه
بوعلي : هههههههههههه لا انتي صغيره على الروضه
دانه واهي معصبه : لالا انا باروح روضه
ام علي : زين يا ام لسانين ماتقول عمرها 4 سنوات
بوعلي : زين يالله انا باروح تأخرت على الشركه .. تآمرين على شئ ؟؟
ام علي : سلامتك .. بتيي ع الغده ؟
بو علي : ان شاء الله
ام علي : ترا اليوم عرس نورة بنت بو سلمان .. و البنات يبون يروحون الصالون
بوعلي : خلاص خلي الدريول يوديهم .. انا باروح اييب منار من المستشفى
ام علي : خلاص عيل .. الله يحفظك ان شاء الله

وطلع بو علي وام علي شالت دانه وحطتها عدال التلفزيون .. وراحت الحديقه تشوف زرعها

** مريم قعدت من الرقاد وبطلت عيونها بصعوبه .. مدت يدها للتلفون ودقت على رقم سلمان بس بعده كان مغلق .. بدت تخاف عليه .. لازم تكلمه بس ليش تلفونه مغلق ؟؟

قامت وبدلت ثيابها وطلعت من الغرفه البيت كان هادئ الكل راقد و الملل مسيطر على البيت .. نزلت تحت مالقت احد بس دانه كانت مندمجه تشوف التلفزيون .. ردت ركبت فوق ووعت صفاء ومنى بس صفاء ما طاعت تقووم

منى : افف ماتخليني ارقد شتبين توها الساعه 10
مريم : حرااام والله متملله ابي اسولف
منى : تسولفين ؟ والله متفرغه
مريم بضيج : حراام والله عندي سالفه جايده مو عارفه ا تصرف
منى بطلت عيونها : شنوو شصاير ؟؟

قعدت مريم على طرف السرير وقالت لمنى السالفه من اولها لأخرها
منى واهي منصدمه : معقوووله كل هاي صار وانا مادري ؟
مريم : اشش شفيج .. سمعيني مابي احد يدري بهالشئ .. بس الله يخليج مادري شاسوي الحين
منى : سمحي لي بس انتي غبيه ! يعني الحين انتي تخلين وحده مثل لولوه تقص عليج ؟؟؟ وتعالي انتي تصدقين كلام روان ؟ والله انا متأكده روانوووه العنز لها دخل في الموضوع
مريم : لا حرام .. ماظن اهي ماقالت لي شئ
منى : لا صدقيني و الايام بتثبت لج .. بس انتي الحين لازم تشوفين لج حل ويا سلمان
مريم واهي خلاص بتموت من الضيجه اللي فيها : اففف والله مادري شاسوي
منى : شتسوين بعد .. لازم تتصلين فيه لي ما تلقينه وتعتذرين منه !
مريم : ان شاء الله .. الله يستر بس

منى واهي تلتفت على صفاء : صفووووووي يالله قوووومي .. يالله بسج
صفاء : االلله يخليج خليني ارقد تراني احلم
منى : لا لا يالله .. لازم نرتب غرفنا اليوم يالله
صفاء واهي اتدس ويها في الموسده : زين باقوم .. افف منج

وعقب نص ساعه

نزلو البنات تحت وتريقو وبعدها راحو يفضون الغرف ويعدلونها .. في هالوقت وصلت منار ويا بو علي اللي طلع من الشركه عشان اييبها .. دشت منار البيت وبنتها في يدها .. واول ماشافتها دانه تمت تطالع البيبي بأستغراب وعيونها مبطلين ع الآخر

ونزلو البنات وسلمو على خالتهم و وخذو اليازيه وودوها فوق وحطوها في المهد اللي جهزوه لها في غرفة منار .. وقعدو يطالعونها ويسولفون هناك

ومريم بعدها تحاول تتصل في سلمان بس تلفونه مغلق .. سلمان كان راقد وكان مقفل تلفونه لأن امس لولوه بنت عمه حرقت تلفونه واهي تتصل بس اهس طنشها ومارد عليها

مريم يأست و شافت ان مافي حل غير انها تتريا لي بعدين يمكن تشوفه في العرس وتقدر تكلمه

ومر الوقت ببطء .. وصارت الساعه 4 والبنات كلهم في الصالون يتجهزن للعرس و ع الساعه 8 كانو مخلصين

منى حطو لها مكياج وردي غامق متدرج و فيه لمعه على الاطراف الداخليه للعين من فوق وتحت وشعرها سووه مموج و سوو حركه فيه بسيطه و خلو الخصل تتدلى على كتفها يعني ما شاء الله كانت روعه
وفستانها كان روووعه عليها

صفاء بطبعها ماتحب تحط مكياج .. كانت محلوه و صايره رووعه
حطو لها مكياج بسيط بلمعه ذهبيه بسيطه و قصت شعرها من الامام Steps وصارت فيه تقطيعه حلوه وثبتوه بالمثبت

مريم كانت مغطيه عليهم .. كانت بسيييطه في كل شئ وتخبل .. مكياجها كان هادئ .. حددو عينها باللون الاسود و نثرو جليتر فضي على جفونها من تحت وفوق ووزعوه بطريقه حلوه .. وشعرها كلن مفلول لكن ملتف شوي مثل شعر نانسي في اغنيتها اليديده وفستانها كان رووووووووعه من تصميم زهير مراد كان وايد حلوو من لونين .. اسود وفضي يعني كان حلو وفخم في نفس الوقت

روان ماكانت وياهم راحت ويا امها صالون ثاني لانها ماتحب تروح وياهم وتحاول انها تتجنبهم
وطبعا منار ماتقدر تروح فقعدت في البيت ويا بنتها

كان المفروض بو علي يمر على البنات .. بس ماقدر لان راح ياخذ مرته وروان .. وكان بيتأخر وايد لأن الصالون بعيد عن الصالون اللي البنات رايحينه

فماشاف غير حل واحد يتصل بسلمان ريل مريم .. عشان ياخذهم من الصالون .. سلمان في هالوقت كان فاتح تلفونه وكان مستغرب من رقم بو علي .. اول ماعرف ان يبيه ياخذ مريم والبنات .. حس بضيجه ..اكيد مايقدر يرفض شلون يرفض ؟ ومريم مرته والمفروض محد يدري باللي صاير بينهم

بو علي اتصل ع تلفون مريم بس مريم ماسمعته فاتصل على تلفون منى .. وقال لها ان سلمان بياخذهم .. منى ماقالت لمريم شئ عشان تتفاجئ

وصل سلمان .. ومنى شافت سيارته .. تغطو البنات بالشيله و مريم انصدمت لما شافت سياره سلمان ! ماتوقعت هالشئ .. ترددت قبل ماتدخل السياره و حست انها متفشله .. بس منى دزتها وركبو السياره .. سلمو وقعدو سلمان ماقدر ان مايطالع مريم .. كان يتقطع من داخله بس ماقدر يشوف ويهها لانها متغطيه بالشيله .. مريم حست بنظراته وكانت منزله راسها وتتجنب انها تشوفه لانها ماتقدر من بعد اللي صار ..

وطول الدرب الكل ساكت وصلو الفندق ونزلو البنات بس مريم مانزلت ! استغرب سلمان من تصرفها و قعد يطالعها بحيره ومريم مو عارفه شلون تبتدي بالكلام

مريم بتردد : سلمان ودي اكلمك
سلمان واهو يشغل السياره : زين تبيني اروح من اهني ؟
مريم بصوت خافت : يكون احسن
سلمان : على آمرج

شغل سلمان السياره وو راح صوب البحر .. اهو يرتاح عند البحر ويحب البحر ومريم اول مره قالت له احبك كانو على البحر ..

سلمان : وصلنه .. خير يامريم عسى ما شر ؟
مريم واهي منزله راسها : سلمان انا آسفه
سلمان واهو منصدم : شنووو ؟
مريم : انا اسفه سلمان حقك على .. انا غلطت في حقك
سلمان بضيج : مريم انتي جرحتيني
مريم رفعت راسها : سلمان سامحني والله العظيم انا متفشله منك .. مادري شصادني مادري شلون صدقت انا لو اعتذر منك لي باجر مابتعرف شكثر انا متحسفه
سلمان : مريم انتي تدرين انا احبج .. وتدرين اللي بينه عمره ما يوصل لهالمستوى .. انا عاذرج بس انتي غلطتي في حقي يوم انج شكيتي فيني ولا خليتيني اشرح لج وادافع عن نفسي

مريم واهي بدت تصيح : سلمااان انتي كل مابقى لي .. ماتبيني اخاف اني افقدك ؟ والله صرت مثل المينونه ماقدرت ايود رووحي .. المشكله ان في وحده اتصلت فيني وقالت لي روحي شوفي ريلج يخونج !
سلمان بعصبيه : حلفي ؟ ومن هاي ؟؟؟
مريم : مااادري
سلمان : مافي غيرها هاي لولوه
مريم : سلمان مايهمني احد بس ابيك تسامحني
سلمان : مريم ..
مريم : نعم
سلمان واهو يشيل الشيله من على ويها : انا احبج
مريم دمعت عينها بس سلمان ماخلى الدموع تنزل
سلمان : لا مابي دمعه تزل من عينج .. مابينه هالكلام .. ومابي اللي صار يأثر على علاقتنا احنا اكبر من جذي صح ؟
مريم واهي منزله راسها : اي صح .. سامحني
سلمان واهو يبتسم : وبعدين وياج
مريم : انزين انا غلطانه ولازم اعتذر

من طرف **قمره** 2009-07-26, 00:45

سلمان : وانا مابيج تعتذرين

سلمان بطل باب السياره ونزل وراح صوب بابها وبطل الباب وقال لها تنزل من السياره

سلمان واهو يطالعها في عيونها : وحشتيني تدرين
مريم واهي مستحيه : انت بعد
سلمان : شفيها يدج ؟؟
مريم بخوف : شفيها ؟؟؟؟؟
سلمان : مادري شوفيها ؟ !
مريم رفعت يدها عشان تشوف وبسرعه سلمان سحبها وباسها
مريم ماتت من المستحى وبعصبيه : يالله خلنا نرجع
سلمان : ههه زين شفيج عصبتي .. عندج مانع يعني ؟
مريم : ...
سلمان : ايه مرتي وكيفي .. وتراني اخبرج عرسنا بعد شهر
مريم بصدمه : شنوووو
سلمان : لاتطالعيني جيه .. بنسوي حفله عائليه ومن بعدها بنسافر شرايج ؟
مريم بخجل : مادري كيفك
سلمان واهو يبتسم : زين يالله خلنا نروح الفندق عشان مانتأخر
مريم : يالله

سلمان : جوفي هناك مادري شنو !
مريم التفت : شنو ؟!؟؟
واهني سلمان يودها وضمها بقووه وباسها على راسها .. مريم تخدرت ماقدرت تسوي شئ ! بس ويها صار جنه طماط
سلمان قعد يغربلها .. يدلدغها و يعظها واهي شوي وبتصيح
مريم : هههههههههههههههههههههههههه والله بس ههههههههههههه
سلمان : لا مافي خليني انتقم منج
مريم : الله يخليك والله توني يايه من الصالون لاتخرب زينتي
سلمان واهو يفج يده : زين احبج
مريم : احبك اكثر ( وشردت عنه ودشت السياره واهو يتحلف انه بصيدها )

ووصلو الفندق وسلمان مو راضي يخليها تروح ويلعوزها كل شوي يوقفها
مريم : الله يخليك الحين نورة بتدخل خلني اروووووح
سلمان مد بوزه : خلاص روحي انتي ماتبيني
مريم : ههههه مايطيح الزعل عليك .. يالله تحمل بروحك
سلمان واهو يضحك : ان شاء الله الغاليه

* عرس نورة كان روووعه كانت صايره قمر و سلطان كان مستانس من الخاطر والبنات ماقصرو تمو يرقصون ومريم اكثر وحده مرتاحه ومستانسه لان المياه عادت لمجاريها
نورة من بعد العرس سافرت فرنسا ويا ريلها عشان شهر العسل

و اختفت سحابه الصيف اللي كانت جاثمه على حياة مريم وسلمان

مرت ايام واسابيع وسلمان ومريم يعيشون احلى ايام حياتهم .. سلمان كل يوم يشوفها ومايشبعون من بعض

اهل شريفه وافقو على خالد وتزوجو بسرعه لان خالد كان مستعيل .. حفلتهم كانت روووووعه لا صارت ولا استوت .. في افخم فنادق البحرين وكانت من ليالي من الف ليله وليله

* اليوم كان اليوم المنتظر بالنسبه لسلمان ومريم .. اليوم اللي راح يربطون مصيرهم بحلقه لا متناهيه .. حياتهم راح تكون ويا بعض مصيرهم ويا بعض

الساعه 9 في فندق الشيراتون في غرفة العروس

مريم قاعده والبنات حواليها بس اهي مب معاهم تفكيرها كان في حياتها اللي مضت واللي يترياها في المستقبل

ويهها كان منوور في ذيج الليله وصايره احلى حورية بشريه ..
كانت تحس بالرضى من نفسها وان امها وابوها الله يرحمهم راضيين عليها
صج تمنتهم وياها بس الله ماكتب هالشئ

مريم كانت جنها ملاك نزل من السما في فستانها الابيض .. كانت غايه في البساطه و الهدوء
كانت لي تمشي يختال الفستان وراها بخيلاء و هدوء

حطو البوكيه في يدها .. وو وقفو عدال القاعه عشان يدخلونها ويزفونها وبالتالي اهي تدخل قفص الحياة الزوجيه ويا اللي تحبه

سلمان دقات قلبه وفرحته بانت على ويهاا .. مسك يد شريكة حياته اللي يشكر الله في كل لحظه ان صارت من نصيبه

ومشوو في طريج الكوشه بهدوء والزفه كانت قويه .. اصوات الطبوول مغطيه على كل صوت

كانو مجهزين اغنيه خاصه لمريم وسلمان .. و مسويين اشرطه ووزعوها على الحضوور

الحفله كانت حلوووه .. كانت عائليه بعض الشئ لان كل شئ صار بسرعه وخلال شهر بس كانت احلى حفله يتوج فيها حب طاهر وقوي ونادر في هالزمن والكل يشهد بهالشئ

الكل كان يبارك هالزواج و يتمنى للمعاريس حياة سعيده وهانئه .. خلص العرس وابتدا مشوار مريم وسلمان في الحياه

ركبو الغرفه والفرحه ماتوصف مشاعرهم .. ماكان عندهم وقت يقعدون ويسولفون وراهم سفر بعد ساعتين

بدلت مريم بسرعه و عطت فستانها البنات عشان يودونه واهي حطت يدها بيد ريلها وراحو صوب المطاار

كانو مخططين انهم يروحون ايطاليا يقضون شهر العسل

مريم كانت اسعد انسانه وسلمان ماكان يقصر عليها بشئ .. قضت احلى ايام حياتها بأيطاليا و في كل يوم كانت تحس انها تحب سلمان ازيد وتتعلق فيه ازيد .. كل واحد فيهم تفجر فيه احاسيس ماكانت موجوده قبل

خلص شهر العسل ومريم كانت تحن عشان ترجع البحرين .. كانت مشتاقه للديره والاهل وصلو مطار البحرين و مريم بعدها مصره انها ماتخبر سلمان وين بيروحون

بس كانت اتدليه الدرب .. سلمان عقب فتره عرف ان هاي طريج بيت اهل مريم الله يرحمهم ووقف عدال البيت واهو يطالع مريم بصدمه

مريم : ادري انك مستغرب ليش يبتك اهني .. بس انا باقول لك ليش .. شفت هالبيت انا اخر مره قبل ماتنقل ابوابه قبل سنتين وعدت ابوي الله يرحمه و حلفت اني مارجع البيت الا وانا مرجعه الفرحه والسعاده فيه .. واليوم انا اسعد انسانه وماظن بيي يوم باكون مستانسه فيه كثر اليوم عشان جيه يبتك اهني .. ابيك تكون وياي وانا ادخل البيت مره ثانيه

سلمان واهو يطالع مريم بحنان : فديتتتج والله .. انتي متأكده انج تبين تسكنين اهني ؟
مريم واهي تبتسم : ايه متأكده
سلمان : خلاص عيل على امرج الغاليه

وانفتحت ابواب البيت ومثل ماوعدت مريم المرحوم ابوها .. دشت البيت ودشت الفرحه وياها حست بأهلها وياها في ذيج اللحظه وحست بأرتياح
خلص شهر العسل ومريم كانت تحن عشان ترجع البحرين .. كانت مشتاقه للديره والاهل وصلو مطار البحرين و مريم بعدها مصره انها ماتخبر سلمان وين بيروحون

بس كانت اتدليه الدرب .. سلمان عقب فتره عرف ان هاي طريج بيت اهل مريم الله يرحمهم ووقف عدال البيت واهو يطالع مريم بصدمه

مريم : ادري انك مستغرب ليش يبتك اهني .. بس انا باقول لك ليش .. شفت هالبيت انا اخر مره قبل ماتنقل ابوابه قبل سنتين وعدت ابوي الله يرحمه و حلفت اني مارجع البيت الا وانا مرجعه الفرحه والسعاده فيه .. واليوم انا اسعد انسانه وماظن بيي يوم باكون مستانسه فيه كثر اليوم عشان جيه يبتك اهني .. ابيك تكون وياي وانا ادخل البيت مره ثانيه

سلمان واهو يطالع مريم بحنان : فديتتتج والله .. انتي متأكده انج تبين تسكنين اهني ؟

مريم واهي تبتسم : ايه متأكده

سلمان : خلاص عيل على امرج الغاليه

وانفتحت ابواب البيت ومثل ماوعدت مريم المرحوم ابوها .. دشت البيت ودشت الفرحه وياها حست بأهلها وياها في ذيج اللحظه وحست بأرتياح

ومرت دقايق ومريم واقفه في وسط الصاله و حست برعشه غريبه واهي تدخل البيت لأول مره من بعد وفاة اهلها .. كانت هادئه وعيونها منغرقه بالدموع سلمان احترم صمتها وكان ميود يدها ويضغط عليها عشان يحسسها ان ماراح يخليها وان اهو وياها
وبعد فتره مريم التفت صوب سلمان وابتسمت له وحاولت انها تغير الجو .. لان خلاص حياتها راح تبدي من جديد وراح تعيش دنيا غير الدنيا اللي عرفتها .. ويا انسان يحبها ويغليها ويعتبرها اغلى شئ في الوجود
مريم : شرايك في البيت ؟
سلمان واهو يطالع البيت : حلو ماشاء الله .. بس ماتظنين ان عود علينا ؟
مريم ابتسمت : اي وايد عود .. بس بصراحه هالبيت له معزه في قلبي .. هاي البيت اهو الشئ الوحيد اللي يذكرني بأهلي الله يرحمهم
سلمان : ادري وانا اقدر هالشئ .. راح نسكن اهنيه ولا يهمج .. اهم شئ راحتج وسعادتج
مريم : زين انا وصيتهم يزهبون لنه قسم
سلمان : ههههههههه زين بس تراني بموووت من اليوع
مريم : زين خلنا نروح الغرفه ابدل وبانزل اسوي لك شئ تاكله
سلمان : لا لاتعبين روحج .. بدلي بنروح نسلم على اهلي و بيت خالج
مريم بفرح : صج ؟؟؟
سلمان : ايه وبعدين بنروح نتعشى وبنرجع البيت
مريم واهي تيود يده وتسحبه : زين يالله بسرعه
سلمان : هههههههههههههههه زين تقولين عنز جيه تسحبيني
مريم واهي تطلع لسانها : اي عنز عندك مانع ؟
سلمان : لا والله ! تعالي باروايج من العنز
مريم واهي تركض على الدري : لا لا لا والله ماقصد بلييز لاتعضني
سلمان : انتي يبتي هالشئ لروحج ..
مريم : لالالالالالالالالالالالالالا
سلمان واهو ايودها : ههههههههههههه يالسلحفاه صدتج .. يالله اختاري وين تبين ؟
مريم برعب : لااااا شنو اختاااار ؟
سلمان : راسج وخشمج ؟
مريم شوي وبتصيح : شلون بعد راسي ؟
سلمان : هههههههه يعني خشمج ؟
مريم حاولت انها تفلت منه بس ماقدرت يودها بقوه وعضها على خشمها واهي تصيييييح " تعورت المسكينه "
سلمان وايد شيطان بطبيعته كان وايد يغربلها ومريم تعودت عليه .. يعضها او يدلدغها يسحب شعرها
ودايما مريم تصييح وسلمان ينكسر خاطره ويراضيها .. اصلا اهو يحب يشوفها تصييح وتزعل عشان يراضيها
وعقب نص ساعه سلمان ومريم كانو زاهبين .. ركبوو السياره وراحو بيت اهل سلمان سلمو عليهم وقعدو ساعه يسولفون عن شهر العسل والعرس مريم عطتهم الصوغه ومن بعدها راحو بيت بو علي
في بيت بو علي
صفاء : افففففففففففف مللتيني منايه خليني اشوف المسلسل الله يخليج
منى : باجر وراي جامعه وانا ابيج تسوي لي البحث
دانه : انا ابي اشوف كرتون
صفاء : زين جيه ؟؟

من طرف **قمره** 2009-07-26, 00:46

منى : ههههههههههه بس خلاص القوى العظمى تكلمت قومي خليها تشوف كرتون
صفاء بعصبيه : زيييييين
وفي هالوقت دشت مريم وسلمان بعده كان واقف بره
منى من شافت مريم شهقت : مريووووووووووووووووووووووووووووووووم
منار : مرامييي فديييتج قربيييي
وتيمعو البنات عليها وسلمو عليها واهمه مستانسين
سلمان من ورى الباب : احم
مريم : لحظه لاتدخل .. يالله لبسوو شيلاتكم ونادو خالي وحشني فديته
نزل بو علي وسلمت عليه مريم و دخل سلمان وقعدو كلهم يسولفون
مريم كانت ميوده اليازيه ماشاء الله كبرت بسرعه وكانت محلووووووووه ومريم تتفداها وتبوسها
طلعوو من بيت بو علي .. وخذو عشى وردوو البيت عشان يتعشون على راحتهم
***************

بعد مرور سنه
روان : الله يخليك .. الله يخليك لاتفضحني والله باسوي اللي تبيه
سالم : سمعيني اذا ماسويتي اللي اقوله لج والله راح افضحج وانشر صورج
روان : حرام بتضيع مستقبلي .. انا باسوي كل شئ الا هالشئ
سالم : شوفي عندج يومين فكري عدل .. وقرري وردي علي خبر .. انتي تقدرين تحدين مصيرج
وراح عنها سالم
روان انصدمت وحست ان احد صفعها حست روحها صحت من سبات .. وفي نفس الوقت كانت تحس انها ضايعه في وسط دوامه حست انها في طريج مسدود مستحيييل انها تلقى طريج الخلاص .. يا انها تبيع روحها وشرفها .. او انها تنفضح ؟؟؟ شنو راح يكون موقف اهلها ؟
اهي كانت تدري انها كانت غلطاااانه وانها تستاهل اللي يصيدها .. بس يمكن انخدعت بسالم وصدقت ان كان يحبها .. او يمكن ثقه الاهل الزايده والحريه والانشغال عنها اهمه السبب اللي ضيعو هالبنت ! او يمكن ربعها اهم السبب !
روان ردت البيت والدموع في عينها ..
البنات كانو في الصاله بس اهي ماسوت لهم سالفه والكل لاحظ انها متضايجه .. منى وصفاء ترددو انهم يلحقونها ويشوفونها
بس منى كانت اسرع من صفاء راحت تشوفها شفيها وليش تصيح
باب غرفتها كان مفتوح .. دشت منى و قفلت الباب وراها وقعدت على السرير
منى : روان شفيج ؟؟
روان : ....
منى : روان ليش تصيحين ؟؟
روان ماردت عليها بس انفجرت بالصياح
منى بخوف : روان حبيبتي بس خلاص قولي لي شفييج
روان رمت روحها بأحظان بنت عمتها وقعدت تصييح من الخاطر
منى ماقالت شئ بس خلتها تصييح وتطلع اللي في قلبها
وعقب فتره .. هدت روان وماحست بروحها الا اوهي تقول لمنى كل شئ صار لها وكل شئ سوته
منى كانت منصدمه وااااايد ماتصدق الكلام اللي تسمعه .. روان طاحت من عينهااا بس لازم تيود عمرها مو وقت انها تلوم روان على اللي صار .. الحين لازم تفكر شلوون تطلعها من هالمشكله
صفاء درت بالسالفه وثلاثتهم محتارييين ومو عرفين شلون يتصرفون
وفي هالوقت مريم كانت تحت توها واصله وكانت تلاعب اليازيه ودانه .. وسئلت عن البنات قالو لها انهم فوق .. فراحت تشوفهم
مريم واهي تفتح الباب : السلام عليكم
البنات : وعليكم السلام
مريم : بسم الله شفيكم ؟؟؟
البنات : ....
مريم بخوف : عن السخافه قولو لي شفيكم ؟
واهني روان دمعت عينها
مريم : روان شفيييج ؟؟
وقعدت روان تقول لمريم السالفه من اولهالاخرها طبعا مريم كانت تدري .. لانها نصحتها من قبل .. وروان كانت متفشله من مريم .. وروان صارحت مريم بكل اللي سوته والسالفه اللي استوت بسبتها بين سلمان ومريم
البنات كلهم منصدمين وولا وحده تكلمت ..
روان : مريم ادري اني طحت من عينج ازيد .. بس والله انا متحسفه ع كل اللي صاار
مريم سكتت شوي لانها حست انها انجرحت من روان اللي كانت مثل اختها
مريم بمراره : لا لاتقولين جيه .. اللي راح راح
روان بيأس : ادري انج مابتسامحيني وانج تكرهيني
مريم : لا لاتقولين جيه .. انا دووم اعتبرتج مثل اختي اللي انحرمت منها .. والعشره ماتهون
وانا اقولج عن نفسي اني مسامحتج على كل اللي صار
روان : السموحه والله
مريم ابتسمت : زين وشنو الحل ويا سالم هاي ؟
روان بخوف : مادري
مريم : انا عندي الحل !
الكل : شنووو
مريم : عطيني رقمه وانا باخلي سلمان يتفاهم وياه .. مثل هالمواقف لازم ريال يتدخل !
روان بتردد : ايه صح .. بس انا بروحي متفشل من سلمان
مريم : لا صدقيني .. سلمان يعزج مثل اختخ ومايرضى عليج
روان : مشكووره مريم
روان من بعد هالموقف اللي صار تغيرت وااااايد .. تابت الحمدالله من سوالفها وتقربت من ربها وودرت ربعها .. وتقربت من اهلها اكثر .. و سلمان حل السالفه ويا سالم ورجع صور روان و سالم تعهد ان ماراح يقرب صوبها

*******
طلعت مريم من العياده والدنيا مو شايلتها من الونااااسه .. ودموووع الفرح تنزل على ويها .. وبسررررعه ردت البيت و قعدت تسوي الغدى وقعدت تتريا سلمان يرد عشان تزف له احلى خبر سمعته في حياتها كلهاااا
وصل سلمان تغدو وقعدو يسولفون
مريم : سلمان ؟
سلمان : عيون سلمان
مريم : ابي اقولك شئ بس خايفه
سلمان واهو يعدل من جلسته : خير ؟
مريم : انه .. انه .. انه حامل
سلمان بطل عيونه ع وسعهم : ح ح حامل ؟؟
مريم بأبتسام : ايه !
سلمان يودها وضمها بالقووووه : مااااصدق ماااصدق .. حلفييي انج حامل ؟؟
مريم بفرح : هههههههههه والله
سلمان : حبيبتي تدرييين شنو فرحني هالخبر ؟؟؟؟؟
مريم : انا بعد واللله .. انا مو مصدقه
سلمان : الحمدالله .. هاي نعمه من الله .. الحمدالله الحمدالله
مريم : ههههههههه الحمدالله
سلمان : يا رب يا رب يارب يطلع على مرتي
مريم : هههههههههه وليش ماتكون بنت
سلمان : بنت ولا ولد .. حياهم الله ... مريوووووووووووووووووووووم احبج
مريم بخجل : انا بعد احبك
** الكل فرح بهالخبر وبارك لهم على هالحمل .. مريم كانت وايد توسوس وتتوحهم وكانت مغربله سلمان بالطلباات .. كل شوي شئ .. ومرت شهور الحمل بسرعه ومريم متحمسه للفرد اليديد في العايله .. اذا ولد راح تسميه محمد واذا بنت راح تسميها دانه
واليوم المنتظر في غرفة الولاده ..
مريم : ساعدني يارب ..
ام علي : ذكري الله .. تنفسي شوي شوي
مريم : وين سلمااان ؟؟
منار : الحين بيتصلون فيه مايدري انج اهني
مريم بصعوبه : زين
ومرت الدقايق صعبه على مريم الولاده كانت عسره .. والدكاتره عطوها مهله لي ساعه 1 اذا ما ربت راح يسوون لها عمليه قيصريه
سلمان كان في سباق ويا الزمن .. يبي يوصل المستشففى بسررررررعه مايبي يخلي مريم بروحها .. وكان يقوود سيارته بسرعه جنونيه .. حتى ان ما انتبه للأشاره الحمرراا .. طافهااا وللأسف ما انتبه للسياره القادمه من صوب اليسااار واصطدمت فيه بقوووووووه .. وفي ثواني قليله تيمعوو الناس عشان يلحقون على الضحايا ويودونهم المستشفى
** في غرفة الانتظار .. الكل يتريا مريم تربي وخايف عليها لان حالتها صعبه شوي ونورة حرقت تلفون سلمان واهي تتصل ومحد يرد .. اخر شئ رد عليها ريال
نورة : اخوي وينك ؟
الريال : السموحه بس صاحب التلفون سوا حادث وانا لقيت التلفوون
نورة بعصبيه : انت شتقووول ؟؟
الريال : اختيه نقلوه المستشفى الامريكي
نوره : ايه انا هناك الحين .. مشكوور اخووي
نوره قعدت تصيييييح وخبرتهم باللي استوااا .. وام سلمان بعد قعدت تصييح وراحو يشوفون سلمان شفيه
نورة لانها دكتوره خلوها تدخل وتشوف حالة اخوووها ! بس للأسف حالة سلمان وايد صعبه وفرصته بالحياه ضئيييله وااايد لانه تعور وايد وعنده كسر في راسه
وبعد مرور ساعات والكل متضايق سمعوو صووت صيااح .. وكان صياح البيبي اللي كان يصييييح واهو مو عارف شنو اهي هالحياه اللي انولد فيها وموعارف ان ابووه بين الحياة والموووت
مريم كانت ميته من التعب شافت ولدها وحملته وحست بشعووور غررييييييييييييييب وحلوووو
الحين هالمخلوق ولدها .. ملكها كانت تتأمله بحنان ومحبه
مريم : خالتي وين سلمان نادووه عشان يشووف ولده
ام علي بأرتباك : ان شاء الله بس انتي ارتاحي
مريم ماقدرت تقاوم التعب .. استسلمت للرقااد وصحت عقب 8 ساعات
وخلال هال8 ساعات حالة سلمان تدهورت اكثر والكل كان خايف ويدعي الله ان يتخطى سلمان هالمرحله
مريم اول ماصحت سئلت عن ولدها وسلمان .. وعقب تردد خبروها ان سلمان مسوي حادث .. مريم انصدمت وقعدت تصيييح من الخاطر ولزمت انها تروح وتشوفه مع انهم حاولو يمنعونها بس ماقدرووو
حملت ولدها وراحت صوب غرفة سلمان .. بطلت الباب وقلبها عورها واهي تشووف سلمان مرقد على السرير و الاجهزه مركبه عليه من كل صوب ..
سلمان كان يحس بوجود مريم وكان يحاول ان يفتح عيووونه .. وبصعووووبه فتحهم وقعد يطالع مريم ومريم تصييييح
مريم : سلمااان
سلمان بصعوبه : عيون سلمان
في هالوقت انطلقت اصوات التحذير من الاجهزه ان سلمان في حاله خطره وبلمح البصر وصلو الطاقم وبدأو ينعشون سلمان ويحاولون ينقذونه .. مريم في هالوقت كانت حامله ولدها بيد واليد الثانيه على حلجها وتصيييييييييييييح

بعد مرور 5 سنواااات

في يوم من ايام الشتاء مريم قاعده في الحديقه تقراامجله و الجو كان روووووعه والغيم منتشر في السما

محمد كان يلعب ويا اليازيه و دانه كانت تراقبهم

نزلت مريم المجله من يدها وقعدت تشوووف ولدها وتبتسم .. يالله شلون تمر الايام بسرعه ... ما شاء الله محمد ولدها كبر ووايد يشبه ابووه

وان شاء الله باجر اول يوم له في الروضه

مريم حطت يدها ع بطنها واهي مستانسه .. شلون بتخبرسلمان عن حملها ؟ اكيييد راح يستانس !

قامت مريم من ع الكرسي و ابتسمت .. ونادت اليهال عشان يدخلون داخل بس ماطاعو .. تأففت بأستسلام ودشت البيت تريا سلمان يوصل

واقل من نص ساعه .. سلمان وصل البيت وكان واقف بره يلاعب ولده و يضحك وياه

مريم كانت واقفه تشوفه من الدريشه سرحانه فيهم وتتفداهم .. شكثر تحب سلمان و ولدها .. الله لايحرمها منهم ومن ضحكتهم

دخل سلمان البيت سلم على مريم وحبها ع راسها .. اهي ابتسمت و حطت له الغدا وقعدو كلهم يتغدون

من طرف **قمره** 2009-07-26, 00:47

وعقب الغدا ركبوو غرفتهم عشان برتاحون .. وعشان مريم تزف الخبر السعيد لريلها

مريم : سلمان ؟

سلمان : عيون سلمان

مريم : تسلم لي عيونك .. باقول لك شئ

سلمان : خير ؟

مريم وعينها تلمع من السعاده : انا حامل

سلمان ونفس البريق في عينه يوم درى بحملها الاول : حاامل ؟؟

مريم بفرح : اييه حااامل

وبنفس الطريقه يودها وضمها بقووووه وقعد يحمد ربه علىزوجته وحياته و وولده و البيبي اليديد

سلمان : مريم

مريم : نعم

سلمان احبج يا عيون سلمان انتي

~*~*~*~ النـــــــــهايــــــــــــــــه~*~*~*~

ما بعد النهايه :
شريفه وخالد : شريفه عندها بنت اسمها مريم عمرها تقريبا 3 سنوات و خالد يمووووووت في زوجته وبنته وعايشين احلى عيشه

صفاء ومنى : كملو دراستهم ورجعو الكويت وانخطبو وتزوجوو .. صفاء عندها ولد عمره سنه اسمه فيصل .. ومنى الحين حامل في شهرها السابع

روان : روان ماتزوجت بعدها .. كملت دراستها والحينتشتغل في بنك..

منار : منار كرست حياتها لبنتها اليازيه .. ورفضت كلالمحاولات من ريلها انها ترد له .. والحين اليازيه عمرها 6 سنوات وماشاء الله عليهاحلووووووووووه وتشبه منار في كل شئ

مريم وسلمان : مريم الحين عمرها 24 وجريب ال 25 عندها محمد ودانه والحين حامل .. سلمان ومريم كانو مثل للحب الطاهر والقوي .. تحدو الكل ووقفو بويهالمشاكل وتخطوها وعاشو حياتهم مثل ما كانو يبونها .. والحين الحمدالله كل شئ ماشي على احسن حال وحبهم كل ماله يكبر ويزيد والرباط اللي جمعهم يزيد في متانته مع مرورالايام

وهذي النهاية ويا حياتي أنا ما أحب أشوف دموع أحد عشان كذا النهاية سعيدة
وشفتوا البارت هذا مرررررررررة طويييييييييييييييييييل جاي على طلبكم حار لسى.. المهم بلييييييييييييييييييز
لا تحرموني من ردودكم أبغى أشوفها حلوة كذا ومنورة الصفحة... عاااااااااااااااااااد لا تنسوني في قصة ثانية نزلتها وهي مررررررررة حلوووووووة زي هذي بس أقصر أتمنى تقرونها وهي(موت الضمير)
ما أقولكم غصب تقرونها بس بسويلها دعاية هنا للي يبغى يقرا شي أنا << وبكل فخر
نزلته

__________________
"س"
"ل"
"ا"
"م"
"ي"
للعيون اللي تناظر شاشة الكمبيوتر

مع تحياتي